Mer Pälzer un die Weltachs
Wann jemand uf de Infall käm,
Die Achs vun unserm Weltsyschtem
Genaa un dipplich auszurechne
Un in die Landkart inzuzeechne,
Do käms eraus, daß akkerat
Im Mittelpunkt vum Pälzer Staat
Der Punkt leit, der wo ganz gewiß
Die Hauptsach uf'em Weltall is
Der Punkt, wo alles sich drum dreht,
Was uf der weite Welt besteht.
Dort werd die Weltachs ingeschmeert
Un ufgebaßt, daß nix passeert,
Was in de Weltelaaf am End
E kleeni Steerung bringe kennt.
Schun seit der Herr die Welt gebaut,
Is uns die Weltachs anvertraut,
Weil meer von alle Menscherasse
For so e Amt am beschte basse.
Mer bassen uf, mer halten Wacht,
Mer gewen Dag und Nacht druf acht,
Daß niemand kummt un will se stehle.
Mer schmeere se un dun se öle
Un butzen se als glitzeglatt
Mit Glaspapier un Butzpumad.
Drum dreht sich a wie selbschtverständlich
Die Weltachs ewig un unendlich.
O weh! o weh! Wär das e Schlag,
Wann pletzlich ame scheene Dag
Mer Pälzer Leit de Rappel kräte
Un mir nix, dir nix streike däte!
Das Unglick wär nit auszumole:
Do dät uns all de Guguck hole:
Die Erd, die Sunn, de Mond un Alles,
Das krät am selbe Dag de Dalles.
Im ganze Weltall däts do bollere
Un alles dorchenanner kollere.
De Mars, Merkur, de Sirius,
De große Bär, de Pegasus,
Das wär ee Riesekuddelmuddel,
Die Milchstroß gäb e Mordsgeschnuddel
Un all das scheene Schöpfungs-Sach
Hätt alles rutzebutz die Krach.
Drum braucht mer Leit, die wo's verstehn
Mit sore Weltachs umzugehn,
Wo Kerl sin erschter Qualidät
Un Riese an Gescheidigkeet.
Un drum sa't unser Herrgott a
Schun glei am vierte Schöpfungsda':
"So", sa't er, "Mond un Stern un Sunn
Die drehe sich un glitzre schun,
Mei Weltachs schnerrt, 's is grad e Spaß,
Als wie e Triller uf de Gass.
Die Weltachs in meim Pälzerland
Das is der Glanzpunkt vorderhand.
Jetzt mach ich noch verschiedne Viecher,
Die Fisch, die Krotte, Löwe, Tiger
Un dann zum Schluß am letschte Da'
E Menschemann un Menschefraa.
Die misse dann die Weltachs schmeere
Un's Kugellager repareere.
Un spätr, wann die Mensche dann
Zu Velkerstämm vermehrt sich han,
Dann - sa't er - dirigier ichs als,
Daß an der Weltachs in der Palz
E Volk wohnt allererschter Klass,
E prima Mensche-Edelraß'
Wo hern im Kopp hat owe her
Un Stolz im Leib un Pflicht un Ehr.
Un - sa't er - dann werd's ingericht,
Daß alles in der Weltgeschicht
Beim Pälzer Volk im Pälzer Staat
Sein Ursprung un sein Fortgang hat."
So sat'er. - Un so is es kumm.
Un um die Weltachs runderum,
Do hockt seit viele dausend Johr
Sei Pälzer Volk un sorgt defor
Bei Dag un Nacht un frih un spät,
Daß Gottes Weltplan richtig geht,
Un daß es Weltall werd gelenkt,
So wie sich's Gott hat ausgedenkt.
Un uf der Welt hat nix kee Wert,
Wanns nit in unsrer Palz passeert.
![oelung.jpg](./download/file.php?id=308493)
- oelung.jpg (56 KiB) 917 mal betrachtet
Entnommen: Paul Münch, Die pälzisch Weltgeschicht, Verlag Lincks-Crusius, Kaiserlautern, 1937